D Baden Masters, wo vom 24. bis zum 26. Auguscht 2018 z Bade-Dättwil im Curling Center statfinded, ghöred zu de grosse Curling-Turniir i de Schwiiz. 20 Teams us 9 Länder sind am Start und unter all dene isch au en Wettiger!
Au wenn Curling nöd grad zu de «Boom-Sportarte» ghört, so isch de Stellewert i de Schwiiz höcher wi in vilne andere Länder. So isch au z erkläre, dass vo de 20 Teams wo ab em Fritig gegnand düend aaträte, 9 us de Schwiiz sind.
De Marcel Käufeler wird mit em Team Schwaller am Start si. Im letschte Johr hend mir s Team interviewd, dismol isch de Ustusch schriftlich gloffe. S Team, wo sich en Olympia-Tielnahm als Ziil gsteckt het, isch i de Wältranglischte innerhalb vomene Johr us de TOP70 ind d TOP20 ufgruckt und ghörd deshalb bi de Baden Masters zum erwiterde Favoritechreis. Nach em Turniir z Bade warted in de nächschte drü Woche witeri 3 Wettkämpf ufs Team, wo alli z Kanada werde sattfinde.