Sit em 2003 wird i de Dütschschwiiz es «Wort des Jahres» gwählt. Mir vo de Wettiger Nochrichte lanciered im 2019 erschtmols es Wort vom Johr für Wettige.
D Voruswahl hend mir en Externe la mache. Scho elleige will eis vo de beide usgwählte Wörter vo ois für e Satire «erfunde» worde isch, chönnd mir de Entscheid unmöglich bi ois i de Redaktion fälle und stelled oich deshalb zwöi Vorschläg zur Abstimmig.
D «Reschtchoschtefinanzierig» isch in d Uswahl cho, will si s Budget vo de Gmeind starch belaschtet und us dem Grund i de Diskussione um d Spitex, aber au bi de Finanzierig vo de Pflägheim e grossi Rolle spield. D Gmeind isch nämli verpflichted, im Pflägebereich alli undeckte Choschte z überneh.
«Ännetwettige» isch zum erschte Mol ineme Artikel vo de Wettiger Satire-Nochrichte uftauchd und bezeichned oisi Nachbarstadt ännet de Limmig und dodemit ännet vo Wettige. Mir bruuched es sither relativ konsequent au bi de Wettiger Nochrichte.
Welles Wort gfalld oich besser, als erschtes «Wort vom Johr» für Wettige? Bis am Mentig chönnd alli wo wend abstimme und zwar uf Facebook und Twitter, e paar Stund no in oisere Story uf Instagram und bis Mentig au per Mail an wettiger.nochrichte(at)gmail.com. Jede het ei Stimm pro Abstimmigskanal, das heisst ihr dörfd bis zu viermol abstimme, mit jewils einere uf Facebook, Twitter, Instagram und per Mail.