Immer wider schaffed es Wettiger Wy unter di Top-Wy vom Aargau. I dem Johr isch d Lägere-Perle 2018 vo Steimer Weinbau, wo zum Staatswy kürt worde isch.
142 Wy sind i dem Johr zum Staatswy-Wettbewerb iigreicht worde, vo dene es 16i in de Final gschaffed hend, schriibd de Kanton inere Mediemitteilig. Damit het es pro Kategori je 4 Wy geh, wo vo de Jury bewerted worde sind. In de Kategori Riesling-Sylvaner het d Lägere-Perle 2018 vom Christian Steimer s Prädikat «Staatswy» übecho. Au de Wettiger Herrebärg Exklusiv vom 2017 isch im Final gsi und het en Uszeichnig übecho.
Dodemit werded zwöi Wy vo Steimer Weinbau de Wäg uf Vevey finde. De Kanton wird nämli am Aargauer Kantonstag bim Fête des Vignerons all 16 Finalwy präsentiire. De Aargauer Kantonstag find am 6. Auguscht statt unter em Motto «Cirque d’Argovin».