Wer in de letschte Ziit uf em alte Friedhof vorbi cho isch, het vilicht gseh, dass dete Stei in de Form vomene Grundriss verlegt worde sind. Das het selbstverständlich en Grund.
Di alt Dorfchile vo Wettige, wo 1894/95 abgrisse worde isch, isch damals uf Abbruch versteigered worde. Das isch in dere Ziit es üblichs Verfahre gsi. Me het d Chile in Segment ufteild und der, wo am meischte bote het, het d Stei und Balke und was es geh het, chönne mitneh. Us de Stei vo de Dorfchile sind z Wettige mindescht zwöi Hüüser baud worde, eis im Alteburg und s zwöit a de hütige Dorfstross 9. Wo das Huus, ehemols Dachdeckerei Wörndli, abgrisse worde isch, het sich de Pius Benz dra erinnered, dass d Stei vo de ehemolige Chile sind nd het si chönne sichere, schuscht währed si im Kieswerch entsorgt worde. Für d Stei het de Pius Benz ned grad Verwendig gha, sonden denkd, me chönnd si emol für e Trochemuur bruuche.
So wiit isch es ned cho. De Roland Kuster, wo das mitbecho het, het schints d Idee gha, mit dene Stei uf em alte Friedhof, wo ja en Ortspark sell werde, de Grundriss vo de alte Dorfchile sichtbar z mache. Au d Denkmalpfläg het das e gueti Idee gfunde, so dass das jetzt umgsetzt worde isch.
Di noi und die alt Dorfchile