D RVBW isch für technischi Inovatione bekannt, sigs bi de Iifüehrig vo FAIRTIQ oder bi de Elektrobüs. Mit Chips, wo me sich cha lah isetze, gönd d RVBW jetzt noch en Schritt witer.
D Technik macht in vilne Beriich atemberaubendi Fortschritt. Was vor einige Johr noch wie Science Fiction tönt het, wird plötzlich Realität und de Iisatz vo künstliche Intelligenz (KI) laht de ei oder andere de Ufstand vo de Maschine, wie im Film «Terminator» fürchte.
D RVBW isch am Ufgleise vonere andere Dystopie und wot so de Chauf vo de Billetts revolutioniere. Nachdem en vilne Büs de Billettchauf numme no per Charte oder au gar nümm mögli isch, sell jetzt FAIRTIQ durch en Chip ersetzt werde. Den Chip cha me sich schmerzlos a de Hand iisetze lah, wobi d RVBW sowohl s Iisetze, wie au de Chip finanziert. Bim Ii- und bim Usstiege wird automatisch registriert, wer es isch und wie wit er gfahre isch und s Gäld wird dann, wie bi FAIRTIQ automatisch abbueched. De gross Vorteil isch, dass me s Aktiviere nümm cha vergässe, was de Eind oder de ander scho schmerzhaft im Portemonnaie gspürt het. De Nachteil isch, dass me lückelos chönnd überwacht werde, wenn d Grät, wo d Büs bechömmed, entsprechend würded platziert werde.