De Inwohnerrot het sech am Donschtig, 7. September 2023 zo sinere 5te Sitzig vo dem Johr troffe. D Frog vo de Teilzoneplanänderig het am meischte z Rede geh.
S 1. Traktandum esch d Inpflichtnahm vo de Sophie Bürgler vo de Mitti gsi. Sie chond anstell vo de zruggtrettene Ariane Dieth in Iiwohnerrot.
Im 2te Traktandum esch s Thema e Teiländerig im Nutzplan Kulturland (Spezialzone Berg) gsi. Das esch es Projekt vo de «Stiftung Begegnung mit Tieren». Debii gods um s Witterbestoh vom e regional bedütende Therapiebetrieb im Bereich vo de pferdegstützte Therapie für sozial Benachteiligi, psychisch kranke oder beiiträchtigte Mensche. De Rat hed zo dere Umzoihnig in ere vo de SVP beaatraite geheime Abstimmig mit 23 Nei zo 22 Ja bi einere Enthaltig sehr chnapp entschiede!
Im 3te Trakdantum esch es Kreditbegehre über ca. 3.5 Milione Franke für Werksleitig- und Oberbausanirierg a de Tägerhardstroos (West) diskutiert worde. D Sanierig isch unbestritte gsi, zu Diskussione Aalass geh het en Aatrag vo de Fraktion SP/WettiGrüen, zuesätzlichi 20’000 Franke für zuesätzlichi Bäum uszgeh. Der Aatrag isch numme vomene Teil vo de GLP unterstützt worde, de Kredit isch aber eistimmig beschlosse worde.
S 4te Traktandum hed au es Kreditbegehre zum Thema gha. D Füürwehr bruchd en Ersatz fürs Universallöschfahrzüg, wobi sich zeiged het, dass es Tanklöschfahrzüg (TLF) langed. De Rat hed die 630’000 Franke ebefalls eistimmig bewilliged.
Bem Trakdantum 5 und 6 esch um zwöi Interpellatione vo de SVP gange, wo de Gmeindrot beantwortet het.