Gmeindrat beaatraid Stüürfuesserhöchig

De Gmeindrat het s Budget 2023 de Medie präsentiert. D Stüürfuesserhöchig isch tüüfer wie z erscht befürchtet.
Di geopolitisch Lag wirbled d Wirtschaft, d Gsellschaft und d Politik kräftig uf, schriibd d Gmeind grad am Aafang vo de Mediemitteilig zum Budget 2023. De Grund esch, dass die Situation sich au uf d finanziell Lag vo de Gmeind uswirkt. Für es usglichnigs Budget bruuchds e Stüürfueserhöchig vo 95% uf 98%.
De Gmeindrat het alles versuecht, zum d Erhöchig vo de Stüürbelastig abzwende, heissts witer, aber d Steigerig vo gebundene Usgabe, also settigi, uf die d Gmeind kein Iifluss het, sie aber gliichwohl muess zahle, mached es Budget ohni Stüürfueserhöchig unmögli. Numme mit dene 3% chönnd di gsetzliche Vorgabe, wo es mittelfristigs Hushaltsglichgwicht vorschriibe, iighalte werde. Berücksichtiged esch be dem Entscheid au, dass d Rechnig 2022 mit eme Verlust rechned, wo vorussichtlich au eso wird cho. Zudem het de Kanton e Stüürreform bschlosse, wo Wettige bi de Stüüriinahme öppe 3% choscht.
Bi de gebundene Usgabe sind folgendi Erhöchige z erwarte:
Zuenahm Choste Asylwese 0.25 Mio.
Zuenahm Energiechoste 0.25 Mio.
Zuenahm Spitexchoste 0.25 Mio.
Zuenahm Choste Besoldig Lehrpersone 0.64 Mio.
Zuenahm Unterhaltschoste Infrastruktur 0.40 Mio.
Bi de Sozialhilf und de Pflägfinanzierig, wo bisher Chostetriiber si gsi, rächned de Gmeindrat mitere Verbesserig vom Rächnigsergäbnis.
Innerhalb vo de Verwaltig isch in einige Beriich – em HR, de Bau- und Planigsabteilig und de Schuelinformatik – d Ufstockig vom Personal wichtig. Netto sind 250 Stelleprozent meh planed. Au mit im Budget 2023 isch e Lohnahpassig vo 2.0% berücksichtiged, wo en Teil vo de höchere Läbeshaltigschischte sell usgliiche.
Uf de Ertragssite het de Gmeindrat d Prognose vom Kanton übernoh, wo für d Stüürreform d Uswirkige für alli Gmeinde berechned het. Vom aktuelle Controlling her goht de Gmeindrat aber devo us, dass d Berechnige vom Kanton zu optimistisch si.
Für d Nettoinvestitione sind 11.6 Millione Franke vorgseh, wobi d Selbstfinanzierig numme bi 5.8 Millione Frnake liegt, womit d Selbstfinanzierig numme bi 50% liegd. Das füehrt widerum zuere Erhöchig vo de Nettoschuld um 5.8 Millione Franke.