Mit de Ablehnig vom Kredit für d Erwiterig vo de Bezirksschuel im September 2021 het d Gmeind e Gsamtplanig für d Schuel usgschaffed. Bis ins 2040 bruchds öppe 200 Millione Franke numme für de Schuelruum.
D Ahzahl vo de Schüelerinne und Schüler stigt und au di pädagogische Ahforderige an de Unterichtsruum hend sich verändered, schriibd d Gmeind innere Mediemitteilig. Das het dezue gfüerd, dass de Schuelrrum in de letschte Johr chnapp worde esch. Mit de Ihfüerig vom Lehrplan 21 het sich die Tendenz noch verstärchd, heissts witer. En Arbetsgruppe us Fachpersone und politische Verträter vo Gmeind- und Iiwohnerrot hend jetzt di notwendige Grundlage erarbeitet, zum en Befreiigsschlag in de Schuelruumplanig z schaffe.
De Masterplan Schuel het d Ziit bis 2040 in de Blick gnoh und glueged, was es bis da anne an Schuelruum bruchd. Alli Schuelstandört sind analysiert worde und au möglichi Neubaustandört. Vo de Frog us, wie d Verteilig vo de Schuelzykle und de Bedarf an Schuelruum chönnd usgseh, sind zwölf Variante entwickled worde, wo dann uf Grund vo vorher definierte Kriterie bewertet worde sind. Als beschti Variante het sich en Neubau voneme Oberstuefezentrum im Gebiet Margelächer/Zirkuswiese usekristalisiert. Die hütig Bezirksschuel würdi dann ab öppe 2030 zuere Primarschuel.
D Gsamtchoste für d Schuel, inkl. de Umbau- und Instandsetzigs-Choste an allne Schuelstandört lieged in de nächschte 20 Johr dodemiot bi öppe 200 Milione Franke. Mit em Masterplan Schuelruumplanig setzt d Gmeind en gwaltige Meilestei zu ere attraktive, zuekunftsgrichtete und moderne Schuelinfrastruktur für d
Wettiger Schüelerinne und Schüeler, schribd d Gmeind.