Magischi Wuche in Sedrun vom 23. bis 30. Juli

Ich chan mich no guet an mis erste Lager als Chind erinnere. Es isch ufregend gsi e ganzi Wuche ohni Eltere zverbringe. So vell fremdi Kind, e ungwohnti Umgebig, Esse wo net Mami / Papi kochet het und denn au no ime Gruppezimmer schlafe. Es isch doch eifach nur mega cool gsi.

Genau die Erfahrige möchtet mir no ganz vell Kind erlebe lah. Mir sind es langjährigs Leiterteam und hend bis jetzt scho guet 10 mal s Sommerlager vo de reformierte Kirche Wettige-Noiehof mitgstaltet. Wil das Lager aber nüm stattfind, hend mer Leiter kurzer Hand beschlosse das uf eigeni Fust z organisiere. Mit Unterstützig vo de Jugendarbet Würelos wie au em Trägerverein Jugendtreff Würelos sind mer parat fürs erste Lager unter de Hauptleitig vo de Andrea Vogt. Wichtig für eus isch, das Wert, wo bis jetzt glebt worde sind, im Lager au witerhin erhalte blibet. Vorallem s familiäre Klima, dass jedi und jede willkomme isch, dass mer zäme chönd lache, guet esse, vell Bewegig und en strukturierte Tagesablauf.

In dem Jahr isch euses Lagerthema «Harry Potter». Die ganz Wuche wird uf das Thema usgrichtet, vom Bastle über Staffetelauf, Wanderig, Filmabig bis ane zum Esse! Euse Lagertag fangt am 8i a miteme usgwognige Zmorge. Nacheme Tagesistig fangts Programm a, je nach Tag und Wetter dinne oder dusse. Eusi Lagerchuchi verwöhnt eus am Mittag denn wieder. Nach de Ämtli und ere kurze Pause, wo mer echli chan usruehe, gats scho gli witer. Nachem Znacht lönd mer de vergangnig Tag revue passiere und nach em Grugei (Gruppegeist) isch au Zit für is Bett.

Falls ich öpis, wo du no möchtsch wüsse, ned ufgschribe han oder du möchtsch e Anmeldig fürs Lager ha, chash dich jederzit be mir melde unter andii.vogt@gmx.ch oder Tel. 078 677 58 33.

Mer freued eus ufe zauberhafti Lagerwuche.