De Vorstand vom Verein Wettiger Fäscht und de Gmeindrat hend zämme bschlosse, s Wettiger Fäscht au fürs 2022 abzsäge. Di aktell Lag bringt zviel Unsicherheite mit sich.
D Coronapandemie het oises Läbe nach wi vor fescht im Griff, was für witergehendi Planige e grossi Flexibilität erfordered. So isch s Wettiger Fäscht uf de Zirkuswiese planed gsi, wo me möglichi Uflage wi d Kontrolle vo Zertifikat einigermassen hetti chönne erfülle. Das hetti aber en enorme zuesätzliche finazielle Ufwand bedüted, schribd d Gmeind innere Mitteilig, wo im übliche Sinn ned het chönne deckt werde.
Zudem isch während de zwöi Wochenende vor em Wettiger-Fäscht-Termin s Kantonali Turnfäscht. Us dem Grund het de Verein Wettiger Fäscht mit dem OK vom Kantonalturnfäscht Kontakt ufgnoh, zum Prüefe, ob e Beteiligung vo de Verein bim Kantonaltunfäscht mögli wär. Dodefür gits erschti Idee.
Nach intensive Gschpröch im Vorstand vom Verein Wettiger Fäscht und mit em Gmeindrat, sind sich di Beteiligte einig gsi, dass s Wettiger Fäscht 2022, wi scho das vom 2021, muess abgsaid werde. De Vorstand bedured das sehr, gseht aber im Blick uf d Planigssicherheit, di finanzielle Risike und d Gsundheit kei anderi Möglichkeit.