Bi de Iiwohnerratswahl am 26. September 2021 isch es zu dütliche Sitzverschiebige cho. Di bürgerliche Parteie hend verlore, di grüene gwonne.
Prozentual sind di Wettigrüene d Sieger vo de Iiwohnerratswahle, wo mit 3 zuesätzliche Sitz d Aazahl Iiwohnerröt meh wi verdopple hend chönne. D Grüenliberale sind d Gwünner, we me di absolute Sitzgwünn aaluegd: Es Plus vo vier Sitz heisst e Verdoppelig vo de Sitz. Wi einheitlich di noi Fraktion wird politisiere blibt abzwarte, sind doch scho di vier bisherige ned immer einig gsi. Wer vo de beide Partei mit em «Grüen» im Name vom Verzicht vom Forum 5430 profitiert het, wo zämme mit de Fraktionspartner EVP au starch in Umwältthemene engagiert gsi isch, isch ned so genau z säge. E Wählerwanderig vom Forum 5430 zu de EVP hets jedefalls ned geh, het d Partei doch nach wi vor drü Sitz im Iiwohnerrat. Au d SP isch bi de Wahle stabil blibe und het ihri nün Sitz chönne halte.
Verlore het klar s bürgeliche Lager, wo mit zwei Sitzverlüst bi de SVP, zwöi bi Di Mitti CVP und eim bi de FDP isngsamt föif Sitz verlore het. We me d glp zu de Bürgerliche zählt, was bispielswiis in de Stüürpolitik durchus sinnvoll isch, relativiered sich aber d Sitzverlüscht wider.
In de noie Zämmesetzig het de Iiwohnerrot ab em Jänner 2022 39 bisherigi und 11 noii Iiwohnerrät: Das sind vo «Die Mitti » de Thomas Benz, d Ariane Dieth (noi), de Christian Wassmer, de Fabian Käufeler, d Simona Nicodet, d Lara Rüfenacht, de Simon Bürgler, d Ursi Depentor, d Marie-Christine Anders (noi) und de Marcel Aebi. Bi de SVP sind d Michaela Huser, de Daniel Notter, de Markus Bader, de Jürg Baumann, de Martin Fricker, de Martin Gilgen, d Sylvia Scherer, de Peter Lütolf und de Roger Scherer gwählt worde. Für d SP sind de Alain Burger, d Christa Camponovo, de Christian Oberholzer, de Adrian Knaup, d Katharina Urfer, noi de Marco Bonadei, de Heiri Müller, d Mia Gujer und de Julien Grundisch in de Iiwohnerrat gewählt worde. D FDP isch in de noie Legislatur mit em Philipp Bürgler, de Judith Gähler, de Désirée Mollet, em Christian Pauli, em Damien Campino und de Gabriela Keller im Rat verträte. Bi de glp sind de Orun Palit, d Manuela Ernst, d Yvonne Hiller, d Ruth Jo. Scheier, d Sarah Steinmann (noi), d Andrea Kleger (noi), de Hannes Streif (noi) und d Andrea Grünenfelder (noi) gwählt worde und bi de EVP de Lutz Fischer-Lamprecht, d Margrit Wahrstätter (noi) und de Lukas Rechsteiner. Last but not least sind di Weetigrüpne Iiwohnerrät z nenne: De Leo Scherer, es Urgestein im Iiwohnerrat, de Basil Baumgartner (noi), de Andreas Leuppi, d Ema Savic (noi) und de Valentin Egloff (noi).
Vo de Bisherige sind 5 nüm gwählt worde, wo aber zum gröschte Teil inere guete Usgangslag sind, zum chönne nocherütsche, wenns im Lauf vo de noie Legislatur Rücktritt git. Das sind vo De Mitti de Markus Zoller, de René Bosshard und de Beat Brändli, bi de FDP de Daniel Brüllmann und vo de EVP de Christoph Fäs.