Werded d Gmeinratswahle doch no spannend?

Quelle: Wikimedia; Foto: Thorsten Meisner; Lizenz: by-sa 4.0

Am 26. September 2021 werd ned numme de Iiwohnerrat gwählt, sondern au de Gmeindrat. Bis jetzt versprichts s Fäld vo de Kandidierende ned veel Spannig.

Vor vier Jahr send d Gmeindratswahle z Wettige e spannendi Sach gsi. 9 Männer und 1 Frau händ für 7 Sitz kandidiert, do drunter 5 Bisherigi. De CVP esch es dodebi glunge, de zwöit Sitz, wo sie bi de Ersatzwahl für de neu Regierigrat Markus Dieth an de Martin Egloff (FDP) verlore gha händ, mit em Sandro Sozzi zruckzerobere. Das esch aber uf Choschte vo de SVP gange, wo mit em Daniel Notter de Sitz vom Daniel Huser ned hed chönne verteitige, au wenn de Daniel Notter s absoluti Mehr erreicht gha het. Dodefür esch de Markus Haas (FDP) Gmeindrot worde, wo de Sitz vo de Antoinette Eckert het chönne für sini Partei verteidige. Glichzitig send mit em Roland Kuster (CVP), em Markus Maibach und de Kirsten Ernst (beidi SP), em Philippe Rey (parteilos) und ebe em Martin Egloff die bisherige weder gwählt worde.
Sit de Gmeindrat im April bekannt geh hed, dass er gschlosse zur Widerwahl aatritt, esch es um witeri Kandidature ruhig blibe. Vermuetige, dass d IG Attraktivs Wettige de Andrea Bova chönnted portiere, hed sech bis jetzt ned bestätiged. Jetzt macht es neus Grücht d Rundi, gits doch in de Soziale Medie e ganzi Reihi Föteli, wo de Daniel Notter mit Parteipräsidente vo zwöi Iiwohnerratsfraktione zeiged, wo de amtierend Gmeindrat in de Ratssitzige regelmässig kritisiered. Die 3 sind zämme uf em Jungfraujoch gsi und eusi Recherche händ ergeh, dass d Initiative für das Träffe vom Daniel Notter usgange esch und d FDP ned involviert esch. Da ligd d Vermuetig nöch, dass de Daniel Notter no einisch de Versuech chönnd starte, zum i de Gmeindrat gwählt z werde. De Aagriff würdi de uf eine vo de FDP-Sitz abziele. Uf eusi Aafrag, ob das meh sig wie es Grücht, het de Daniel Notter bis jetzt ned reagiert.