Uf de Website vo de Gmeind Wettige sind alli Veraastaltige, wo me unter de Rubrik Aaläss uf de erschti Blick gseht, abgsaid. Di reformiert Chile het sogar i de Karwoche und an de Oschtre d Gottesdienscht gstriche.
Innerhalb vo eim Tag isch d Aazahl Mönsche, wo i de Schwiiz mit Coronavirus infiziert sind, um 800 aagstige. De Bundesrot beroted sich grad mit de Kantonsregierige, wi es sell witergeh. De «Lockdown» rückt nöcher.
Vili Veraastalter hend vo sich us scho Aaläss abgsaid. Uf de Site vo de Gmeind Wettige sind unter Aaläss uf de erschti Blick s Jasse (16.3.), Annas Chinderjodlerchörli, Fitness und Gymnastik Wettige, e GV, en Mittagstisch und Schach (alli am 17.3.) cancled worde.
Sehr entschide het au d Chilegmeind Wettige-Noiehof reagiert. Si het bekannt geh, dass si bis und mit 20. April alli Veraastaltige und Gottesdienscht laht lah usfalle. S Ziil isch, d Infektionskette z unterbräche, Solidarität mit de Risikogruppe z zeige und s Gsundheitssystem vor em Kollaps z bewahre. Au d Kolibriwoche, d Senioreusflüg und s Sommerlager sond betroffe. Wi d Verbreitig vom Virus bis im Juli witergoht, dass wüsse me zwar ned, so de verantwortlich Lagerleiter Pfr. Lutz Fischer-Lamprecht, «aber d Iiladige werded normalerwiis über d Schuel verteild, was im Momänt ned möglich isch.» Zudem sigs schwirig mit Begeischterig zueme Lager iizlade, vo dem me ned wüsst, obs cha stattfinde. «Au de Eltere gegenüber sig es so fairer, wils Lager für vili au en wichtiger Bestandteil vo de Chinderbetroiig isch und da isch es wichtig, dass me sich druf cha verlah» Schmerzvoller sig für ihn aber d Absag vo de Gottesdienscht in de Karwoche und an Oschtere. Da sig wohl en historische Entscheid, so de reformiert Pfarrer.