D Chilerächnig schlüsst miteme Überschuss

Bi de «Sommergmeind» vo de reformierte Chilegmeind Wettige-Noiehof, wo zum erschte Mol vo de noie Präsideti Margrit Wahrstätter gleitet worde isch, isch d Rechng gnehmiged, en noie Chilepfäger gwählt und usführlich über di laufend Evaluation zu de Immobilie brichted worde. 
68 Stimmbrechtigti und einigi Gäscht hend de Wäg ins Chilegmeindhuus z Wettige gfunde, um a de Chilegmeindversammlig teilzneh. Nach em musikalische Uftakt mit em «Silberhorn-Duo» und sine Alphornkläng het d Versammlig di traktandiirte Gschäft behandled.
D Rechnig 2018, wo nach föif Johr mit sinkende Stüüriinahme en lichte Aastig im Vergliich zum Vorjohr ufgwise het, het mit em erfroiliche Überschuss vo öppe 140’000.- Franke abgschlosse, das bieme Gsamtufwand vo 2’529’646.09 Franke. Überschüss bi de Stüüriinahme, so de verantwortlich Chilepfläger Peter Müri, hend au de Bund, de Kanton und vili Gmeinde im 2018 z verzeichne gha. E Trendwändi sig das ned. Er het aber au allne Mitarbeiterinne und Mitarbeiter vo de Chilegmeind es Kränzli gwunde für de choschtebewusst Umgang mit de Stüürgälder.
Für d Regula Gysel Oderbolz, wo nach mehr wi 8 Johr us de Chilepfläg zruckträte isch, het d Versammlig de André Widmer für de Rescht vo de Amtsperiode i d Chilepfläg gwählt. Dodemit isch en nahtlose Übergang gwährleischted und alli nun Sitz vo de ehreamtliche Chilepfläger sind bsetzt.
Uf Interesse sind au d Usführige vom Präsident vo de Immobiliekommission, em Pfarrer Lutz Fischer-Lamprecht, gstosse. Er het über di verschidnige Schritt brichted, wo im Blick uf d Ligeschafte unternoh worde sind, sit d Chilegmeindversammlig im Herbscht 2017 en Kredit über 100’000.- Franke gschproche het. Di vorhandene Gebäud selled unter d Lupe gnoh werde und es gilt en Immobilienstrategie z entwickle, wo zuekunftsfähig isch. Es sig scho vil Ziit und Büez inveschtiird worde und d Bestandsufnahm, d Analyse vo de Gebäud und d Ermittlig vom Ruumbedarf siged so wit abgschlosse, so de Fischer-Lamprecht. Jetzt sig d «Fachgruppe Baute» dra, es Gebäudekonzept z entwickel, wo – so de Uftrag – au d Finanze im Blick het. Ohni irgendwelchi Vorbedingige sind bisher alli Optione offeghalte worde, was en Ernoierig, Umnutzig, Abbruch, Ersatznoibau oder de Verchauf vo Ligeschafte oder Grundstück beträffi. Nach Gschpröch mit de Gmeinde Noiehof und Wettige, zum Abkläre vomene allfällige öffentliche Interesse a de in de öffentliche Zone befindliche Areale, het d «Fachgruppe Baute» reschpektiv d Chilepfläg zwöi Machbarkeitsstudie in Uftrag geh – je eini für s Areal vom Chilegmeindhuus Noiehof und Wettige. Z Wettige wird sich d Iiwohnergmeind a de Machbarkeitsstudie beteilige, wil s Areal günstig zum Schuelhaus Alteburg liegd. Dete isch en erhöhte Ruumbedarf nochegwisen. Bi de aaschlüssende Frogerundi isch au d Frog ufcho, ob d Chilepfläg scho über en allfälligi Fusion berote hetti.
Zum Abschluss het de Synodal Roger Vogler von de Sommersynode z Aarau brichted und aaschlüssend het d Präsidenti Margrit Wahrstätter zueme Apéro iiglade, bi dem aageregd witer diskutiird worde isch.