Dä Petrus hett’s guät gmeint mit de Uusflügler wo am 14. u 15. Mai 2019 ungerwägs sy gsy!
Am 14. isch es zwar es chylses Tschüppeli gsy, wo sech in Begleitig vom Nöiehofer Seniorenomittagsteam u dr Soziaudiakonin Yvonne Keller am Nomittag uf de Wäg em ganze Zürisee entlang u wiiter uf Benken SG gmacht het: 18 Persone – eini dervo e Gascht us Holland! Ned schlächt gstuunet het me de ou, wo dr Herr Wick, de Gründer vom Sanktgallisch-Schwyzerische Bäckereimuseum se uf Holländisch het chönne begrüesse u grad nomu gstuunet het me, wöu är Wettige guet kennt: Sini Lehr het är nämli ir Bäckerei Domeisen z’Wettige gmacht! Gleitig isch Zyt ume gsy bi dene interessante Uusfüehrige vom Herr Wick, wo s Museum i sym umboute Elterehuus z Bänke mit viu Härzbluet iigrichtet het und es tuusigi Sache u Sächeli z’gseh gyt wone Beck für syni Arbet bruucht u o no es paar Oldtimer u auergattig „Ruschtig“ (Uusrüschtig) für’s Läbe i früechere Zyte. E feine Zvieri ir Bretzelstube het dä Bsuech abgrundet u zfride u glücklech isch me de wider heizue gfahre – dasmou natürli uf dr angere Seesyte.
Am 15. hei d’Teilnähmer früecher us de Fädere müesse: Am Achti isch de Car losgfahre u mit total 36 Persone uf diräktem Wäg zum Gaffee-Haut im Café Knaus z’Oensige, wo d’Uuswahl ir Vitrine no grösser isch als im Himu. Dorum isch die eint oder anger Täsche meh i Car gwanderet uf dr Wiiterfahrt. Wöu me pünktlich het wöue z Les Bois sy für de Zmittag hett es nid glängt, zum viu über Land fahre, aber me het doch Glägeheit gha, die klassische Jura-Weide mit em saftige Grüen u de viune chlyne Gruppe vo Tanne u de Trochemüürli derzwüsche z’gniesse. Bim Zmittag het de dr Schofför mit dr Reiseleitig veriibart, dass in Aabetracht vom zügige Luft uf de Jura-Höchine d’Besichtigung vom Pferde-Autersheim echli abgchürzt wird. Das isch vo aune Seniore u ou vom Wettiger Seniorenomittagsteam, wo därum mit derby isch gsy, positiv uufgnoh worde: D’Biise het so richtig gchuttet u es isch meh weder eis Chopftuech aagleit worde oder d‘Chräge uechegschlaage, wo me sech noch em feine Zmittag zu de Stallige uufmacht het! Glohnt het sich d’Füehrig trotzdäm… Es isch überau früsch iigströit gsy i de Boxe u blitzsuuber. Me hätt diräkt chönne es Mittag-Schlööfli mache! D’Rössli, Pony u Esle uf dr Kopple sy zwar aui scho lengschtens im Pensionsauter, aber me het gmerkt, dass es ihne do a nüüt fäut. D’Fahrt über de Chasseral und am Bielersee entlang isch e fröidigi Überraschig gsy für d’Seniore! Letschti Schneeräschte sy no ume gsy und ou wenn d’Färnsicht nid ganz optimau isch gsy, so het me doch e tolle Uusblick uf Nöieburger u Bielersee mit Petersinsel gha uf em Wäg nach Florida… Ne nei – über de gross Teich het es a dem Tag natürli nid glängt – nume zum Zvieri-Halt im Tropegarte-Restaurant mit glychem Name. D’Heifahrt isch wieder flott voraa gange u noch eme Nidle-Täfeli (zum de Hals schmiere) het me wie scho am Dsischti im Car no zwöi Lieder aagstimmt vor dr Heichehr. „Grosse Gott mir lobe Dich“ isch s’eint Mou ou derbi gsy u das Lob gilt ou em Petrus wo de Wasserhanhe a beede Täg wunderbar zueträit hett.