Vor rund ere Woche, am Fritig, 1.März, hed CVP Wettige im Pfarreiheim St.Sebastian ihri GV abghalte.
Pünktlich uf die Sebni send die Erste vo über 85 Persone, Mitglieder und Gäst us de umliegende Ortsparteie itroffe. Under de Gäst send de Regierigsrot Markus Dieth, Frau Gmeindamme vo Neuehof, d Susanne Voser, de Gmeindamme vo Wettige, de Roland Kuster und d Grossrötin und Parteipräsidentin vo de CVP Aargau, d Marianne Binder ahztreffe gsi.
D Präsidentin, Ursi Depentor, wo sit eme Johr jetzt i dem Amt esch, hed zo de einzelen Traktande Brecht erstattet. Verabschedet als Iwohnerröt send de Jürg Rüfenacht und de Reto Hueber wurde. A ihre Stelle hed d CVP d Marija Hess und de Simon Bürgler willkome gheisse. Als Fraktions-Präsident esch de Christian Wassmer begrüesst wurde.
Zusätzlich hed d CVP Wettige im letschte Johr, 13 neue Mitglieder gwonne. Der Marco Affolter esch als neu Aktuar in de Vorstand gwählt worde.
Als Gastsprecherin esch i dem Johr, d Jasmina Ritz vo de Limmat-Stadt z Wort cho. Ihri Red hed ufzeigt, was für es Potenzial i de Region Limmattal liegt, wo aber veelne Bewohner vo dere Region gar ned klar esch. Im 3D-Stadtmodell, inklusive de VR-Brille händ d CVP-Mitglieder und Gäst d Möglichkeit gha, das ganze chönne z probiere. Es esch rege gnutzt wurde und hed Begeisterig usglöst.
Nach all dem hed denn endlich zum gmüetliche Teil chönne g’wechslet werde, zom tratitionelle Raclette-Esse und em anschliessende Dessert-Buffet.