Am Samschtig, 9. Februar 2019 hend AFM Futsal Maniacs ihre erschte Heimatch vo dem Johr gschpild. Durch de Siig gege de FC Üetedorf hend d Maniacs de Gegner i de Tabelle überholt.
Vor em Match isch d Aaspannig bi de Maniacs z gschpüre gsi. De bisherig Saisonverlauf isch ned überzügend gsi und mit em FC Üetedorf isch am Samschtig de besserplatziird Tabellenachbar z Gascht im Tägi gsi. En Siig isch also Pflicht gsi, um uf de 4. Platz chönne vorzrücke.
D Maniacs hend di Herusforderig gmeischtered – und wi! Für d Zueschauer isch de Match fascht e chli langwilig worde, sind doch d Goal für d Maniacs fascht wi am Fliessband gfalle.
Scho i de erschte Minute het de Nick Reinert s 1:0 gschosse und in de 5. z 2:0. Di witere Goal in de 1. Hälfti sind dann in de 6., 7., 9-, 11., 12. (2 Goal), 15. und 19. (au 2 Goal) gfalle und nebem Nick Reinert, wo au s 7:0 markiirt het, hend sich de Claudi Fernandes, de Ricardo Gomes (4x), de Yuri Steffen, de Alessandro Facchinetti und mit eme Eigegoal de Ardit Nasufi in d Torschützelischte iitraid.
In de 2. Halbziit hend d Maniacs dann no einisch 10 Goal gschosse, wobi de Ricardo Gomes no einisch viir Mol (21′, 27′, 31′,31′), de Claudio Fernandes drü Mol (22′, 28′, 30′) de Pascal Brunner einisch (29′). De letscht Treffer vom Match het de Nick Reinert in de 39. Minute gschosse. 21 Sekunde vor Schluss het de Maa mit de 21 uf em Rugge also 21:0 markiirt. in de letschte 21 Sekunde hend Üetedorfer dann de Match verlore geh, nachdem si vorher immer wider versuechd gha hend, de Ehreträffer z erziile.
Mir hend nach em Match de Captain vo de Maniacs, de Alessandro Facchinetti gfröged, wi so en klare Siig gege en Gegner het chönne z Stand cho, wo nach em Tabellestand ja nöd als schwächer iizstuefe isch. Bi de Üetedorfer hend einigi Spiler gfehld, wo au no Fuessball spiled, so de Alessandro. Zudem het halt bi de Maniacs au eifach vil gschtumme …
No sächs Match stönd aa, dadevo 4 dihei, bis klar isch, obs de Maniacs in d Playoffs schaffed, also zu de beschte viir Schwiizer Futsal-Teams vo de Saison 2018/19 ghöred.
