Uufall uf de A1 zeiged, wi wichtig s richtig Verhalte biere Panne isch

Am Samschtig, 12. Jänner 2019 het es uf de Brugg vo de A1 über d Limmig en Uufall geh, wo no übleri Folge hetti chönne ha. D Kantonspolizei (Kapo) nimmd das zum Aalass, an s richtigi Verhalte z erinnere.

Uf de A1 isch am Samschtig en BMW ins Schlüüdere cho und het rückwärts en Oldtimer grammt, wo ligenblibe gsi isch. De Ufprall isch so heftig gsi, schriibd d Kapo in ihre Mitteilig, dass de Chevy Camaro uf en VW Polo gschobe worde isch, wo devor gschtande isch. Genau dazwüsche isch en junge Maa gschtande, wo de Chevy mit em Polo het welle parat mache zum Abschleppe. Er isch, fascht wi durch es Wunder, «numme» mit Chnochebrüch davo cho.
D Kapo schriibd in dem Zammehang, wi me sich bi ere Panne uf de Autobahn set verhalte:
– Uubedingt hinter de Leitplanke stah oder e Rettigsnische bruuche
– Sofort de Polizei aalüte (Notruef 117 oder Notruefsüüle)
– Nieemd dörf im Auto warte
– Nie d Fahrbahn beträte

Zudem betond d Kapo, dass es Abschleppe vom Oldtimer durch en untermotorisiirte VW Polo es grosses Uufallrisiko gsi wär und das me settigi gfährlichi Aktione im dichte Vercher uubedingt muess vermiide.