Am 20. Juli 2018 het de Blick es Video mit de Schlagziile «Samariter-Vereinen droht das Aus» veröffentlicht. Ufgrund vo strengere Vorschrifte hetted vili Samariter-Verei Probläm. Mir hend de Christian Bassler vom Samariterverei Lägere gfröged, wi es bi ihne im Verei usgseht und ob mir ois Sorge um d Wettiger Samariterverei müend mache.
Wettiger Nochrichte: «De Blick het vor kurzem online drüber brichted, dass d Samariterverei wege noie Vorschrifte Probleme ha werded. Um was gohts da genau?»
Christian Bassler: «Dä Interverband fürs Rettigswese (IVR), d Dachorganisation vo allne Rettigsorganisatione, häd neui Vorschrifte für d Usbildig und dä Isatz vo Laiehälfer erla. Dä Schwizerischi Samariterbund und dademit au alli Samariterverein haltet sich neu a die Richtlinie.
D Richtline gsänd vor, dass es drü Stufe für d Laiehälfer gid. D Stufe 1 isch grob gseid dä bekannti Nothilfekurs – wo mer für dä Füereruswis muess mache – und dä Reanimationskurs. D Stufe zwei isch en zweitägige Kurs mit erwiterete Erste-Hilfe-Känntnis, des bisherig Samariterkurs. Di dirtti und höchschti Stufe isch en sächstägige Kurs für Betriebssanitäter und alli wo es breits Wüsse i dä erwiterete Nothilf wänd ha. D Inhält vo dene Kürs, Teilnehmerzahle und wer die Kürs dörf unterrichte, sind klar feschschtgleid. Zur Kontrolle wird alles innere Datebank vom IVR erfasst und kontrolliert.
D Aforderige ad Kursleiter vo dä Samariter sind gstige und der Ufwand zum Kurs durezfüere isch massig grösser.
Wenn mer so en Kurs gmacht hed, denn isch das aber nonig alles gsi. Zum sini Usbildisstufe bhalte muess mer innerthalb vo zwei Jahr ä vorgschribni Aazahl Witerbildisstunde bsueche. Sprich en Betriebsnothälfer oder au en Samariter muess gwüssi Witerbildige chöne nachewise, damit er sini Stufe erhalte chan und witerhin berächtig isch Sanitätsdienscht zleischte.»
WN: «Welli Folge het das konkret für oie Samariterverei?
Christian: «Für dä Samariterverein Lägere Wettige händ die neue Richtlinie vom IVR kei ischnidendi Konsequenze. Die neue Richtlinie chömed nid ganz überraschend und inovativi Verein händ bereits sit Jahre uf dErfüllig vo dene Vorgabe higschaffed. Üsi Kursleiter verfüeged alli über grossi Erfahrig nid nume i dä Nothilf, sondern chömed fascht all us em Umfäld Rettigsdienst und Spital. Näbet dä fachliche Qualifikatione verfüeged alli Kursleiter über fundierti Diplom i dä Erwachsenebildig. Erfreulicherwis dörf dä Samariter als eine vo wenige Samariterverein i dä Schwiz au Kürs i dä höchschte Stufe 3 abüte.
Da dä Samariterverein Lägere sit villne Jahre vieli grösseri Sanitätsdienscht abütet, lueged mer scho sehr lang druf, dass alli Mitglieder entsprächend witerbildet sind. Das wird bereits sit Jahre imene eigene System erfasst und kontrolliert. Mer bemühed üs nach wie vor, dass alli Samariter über stufegrächti Witerbildige verfüeged. Neu chömer üsne Mitglieder sogar entsprächendi Zertifikat vom IVR für bsuechti Witerbildigsstunde ushändige. Es hed allso nid nume Nachteil. Dä einzelni Samariter muess zwar öpis mache um am Ball z blibe, aber er häd neu au die entsprächende Zertifikat i dä Hand.
Leider wird aber dur das dä ganzi Ufwand einiges grösser, so werdet d Vorstandsmitglieder und d Kursleiterinne immer meh belaschtet. Froglich isch wie lang mer dä grossi Ufwand na chan als Hobby bewältige. Das isch für dä Samariterverin Lägere Wettige eini vo dä grosse Herusvorderige; wie bewältiged mer mit eme beschränkte Budget dä grossi Arbetsufwand.»
WN: «Kenned ihr Verei in de Umgebig, wo Probläm mit de Umsetzig vo de noie Vorschrifte werded ha und was isch bi dene anderscht, wi bi oi?»
Christian: Je meh Kürs me chan abüte, je meh Sanitäsdienscht mer dure fühert, je meh Kursleiter sich im Verein engagiered, um so eifacher isch es, die neue Vorgabe z erfülle. Das machts leider für chlineri Verein dütlich schwiriger. Wenigi Kursleiter müend sich die ufwändigi Arbet ufteile. Teilwis müend Mitglieder und KursleiterInne Ufschuelige bsueche.
Bi üs i dä Region isch dä Druck viellicht nid ganz so gross wie i ländlichere Regione, aber d Ischränkige und dä Mehrufwand sind dütlich spürbar.
Enttüschend isch dadebi ganz klar, dass vom Schwizerische Samariterbund kei Unterstützig spührbar isch. D Samariterverein fühled sich im Momänt vo dä Dachorganisation sehr älei gla.»
WN: «Welli Unterstützig brüchted ihr bzw. hetted ihr gärn vom Schwiizer Verband?»
Christian: «Die ganzi Administration für die Zertifizierige und s ganze Kursmanagement müend dVerein mache. Da chönit dä Schwizerischi Samariterbund understütze. Die meischte Samariterverein sind nid gnüegend informiert und d Uskünft vom Samariterbund sind unzuelänglich und hüfig unbefriedigend. Da müesst er d Verein berate.»
WN: «Danke, dass du dir für ois d Ziit gnoh hesch! Dir und de beide Wettiger Samariterverei wünsched mir für d Zuekunft alles Gueti!»