De Hallebode isch parat!

Am Fritig, 16. Februar 2018 started de EuroHockey Indoor  Club Cup, Men im Tägi. Geschter isch de Hallebode verlegd worde.
Wi scho im letschte Johr für de EuroHockey Club Cup, Women isch au in dem Johr in de Sporthalle im Tägi en andere Bode verlegd worde. 1135 Quadratmeter sind es gsi, wo 16 Persone innerhalb vo öppe viir Stund verlegd hend. Es isch en exakti Arbet, wo d Equipe het müesse leischte, denn Bodewelle oder Lücke dörf de Bode nöd ha. Aaschlüssend hend viir Lüt d Zeichnige vom Spilfäld vorgnoh, wo es fürs Hallehockey uf em Bode bruuchd. De Grund für de noi Bode: so sind numme di Linie ufzeichned, wo fürs Hockeyspile notwendig sind, was es fürd Zueschauer eifacher machd.
S Turniir started am Fritig um Zähni am Morge mit em Match zwüschem öschtriichische Verträter SV Arminen und de Mannschaft vo SPV Complutense us Spanie und änded am Sunntig, 18. Februar mit em Finalmatch (Beginn 14.30 Uhr) und de Sigerehrig, wo uf di Viirtelvorviiri am Namittag vorgseh  isch. De Spiilplan finded ihr hiir: http://www.rww.ch/eurohockey-indoor-club-cup-men-2018/results