De Überraschigsgascht isch de Noel Ott gsi

Vili Wettigerinne und Wettiger und au e paar Uswärtigi hend sich an Noijohr uf di Föifi am Abig uf em Zentrumsplatz iigfunde. De Gmeindamme Roland Kuster het de Wettiger Beachsoccerspiler Noel Ott als Überraschigsgascht präsentiirt.

Nach de Begrüessig vo de Aawesende het de Roland Kuster e paar Schwerpünkt vom noie Gmeindrot gnennt. „Get together“ sigs Motto vo de sit hüt noi zämegsetzte Exekutive. Au de vorsichtig Umgang mit de Finanze het er thematisiirt, wo im Iiwohnerrot au immer wider Thema sig. Danach isch de Noel Ott ans Rednerpult träte, de 23-jährig Wettiger isch im 2017 in d Beachsoccer-Weltuswahl gewählt worde. Er het von sim Wäg vo de U16 bi de Grashoppers, über de Rückschlag, wo er es dete nöd in d U18 gschaffed het, bis zum Zuefall, wo ihn zum Beachsoccer brochd het, verzällt. „In der Kürze liegt die Würze“ isch sis Motto und so hend alli bald d Glägeheit gha, Fründe, Bekannte und Nachbuure es guets Nois z wünsche, no en Becher Punsch oder Glüehwii ztrinke und Maroni z ässe.