Sowohl di Reformiirte, wi di römische Katholike wähled am Sunntig, 23. September 2018 ihri Behörde und Amtsträger. Es demokratischs Rächt, wo hoffentlich vo vilne wahrgnoh wird.
D Landeschilene sind im Aargau ähnlich organisiird wi de Staat. Das isch eini vo de Vorussetzige, um als Landeschile anerkannt z werde. Am Sunntig sind d Wahle und d Situation bi de Reformiirte und de Katholike sind rächt unterschidlich. Bi erschtere hets genau so vil Kandidatinne und Kandidate, wi es bruuchd, bi de Katholike gits no Ämter, für di niemed kandidiird, jedefalls nach em aktuell veröffentlichte Stand.
Hiir d Übersicht über die Kandidiirende:
Bi de Reformiirte kandidiired für d Chilepfläg de Christian Forrer (bisher), d Iris Baroncelli (bisher), d Regula Gysel Oderbolz (bisher), d Angela Mannarino (bisher), de Peter Müri (bisher), d Margrit Wahrstätter (bisher), de Jörg Laaser (noi), de Nico Wegmüller (neu) und d Maya Padiyath (noi). Fürs Präsidium vo de Chilepfläg kandidiird noi d Margrit Wahrstätter. Für d Synode kandidiired di drü bisherige, de Lutz Fischer-Lamprecht, de Roger Vogler und d Regula Gysel Oderbolz. Bi dene Wahle chönnd au alli Stimmberechtigte gültigi Stimme übecho. Anderscht isch das bi de Wahle vo de Ordiniirte. Det kandidiired au alli bisherige. Für d Pfarrämter de Stefan Burkhard, d Kornelia Baumberger-Dängeli, de Lutz Fischer-Lamprecht und d Renate Bolliger König, als Sozialdiakon de Michael Schatzmann und s Yvonne Keller.
Bi de Katholike kandidiired nach de obe verlinkte Lischte für d Chilepfläg de Marcel Aebi (bisher), de Bernhard Lang (bisher), de Vincenzo Santoro (bisher), de Franz-Beat Schwere (bisher) und noi de Raymond Alvarez. D Präsidium vo de Chilepfläg blibd schinnts witerhin vakant. Für di viir Synodesitz gits drü Kandidiirendi, de Markus Brunner (bisher), d Helen Müller (bisher) und d Christine Lehmann (noi). Au d Pfarreirät werded gwählt, wobi für de Pfarreirat St. Sebastian folgendi Kandidatinne und Kandidate gmelded sind: d Anita Baumgartner (bisher), de Thomas Meier (bisher), de Martin Moser (bisher), d Judith Oeschger-Egloff (bisher), d Muriel Bruderer (noi), d Monika Nietlispach (noi) und d Brigitte Zimmermann (noi). Für de Pfarreirat St. Anton sind schints numme de Odo Camponovo (noi) und de Matthias Hitz (noi) zur Wahl vorgschlage. Vili vo de bisherige hend nüm dörfe aaträte, will es bim Pfarreirat en Amtsziitbeschränkig für zwei Wahlperiode git.