Under em Name «Wir sind 100%» händ vor öppe eme Johr d Wettiger Chendergärtnerinne e Gruppe gründet. Es goht ihne um d Aazahl Lektion, wo es für es 100%-Pensum bruuchd.
Med de Unterstützig vom VPOD und ALV hed sech die Gruppe agfange z wehre, gege die Änderig wo de Lehrplan 21 im Johr 2021 brocht hed. Gmäss dem esch 1 Lektion gstriche worde, was 3.5% Lohnreduktion bedütet, oder was i einige Gmeinde dezue gfüehrt hed, die 28igsti Lektion mit Arbeite usserhalb vo de Klasse z ergänze, was pädagogisch oft ned sinnvoll isch. Vieli chönd nümme 100% verdiene. Aber sie schaffed glych s volle Pensum, will jo d Chind die ganzi Zyt, au i de «Pause» betreut und gförderet werdet!
Dorom forderet sie vom Regierigsrot vom Kanton Aargau:
– dass d Arbed vo de Chendergarte-Lehrpersone mit Klasseverantwortig und em volle Pensum au als 100% Astellig im Chendergarte anerkennt wird.
– dass das Pensum, med de eigene Klass au erreicht werde cha.
– dass d Unterrichtsduur am Chendergarte dur de Kanton verbindlich greglet wird.
Am letschte Fritrig, 23. Juni 2023 am Zwoi esch die Petition «28 Lektionen am Kindergarten» de Staatsschrieberin Joana Filippi übergäh worde. 946 Chendergartelehrpersone und 619 witteri Persone us em Chendergarteumfeld händ unterschriebe. D Unterschrifte send i knapp zwoi Mönät zäme cho. Die grossi Aazahl Unterschrifte vo Zwoidrittel vo betroffene Chindergärtnerinne zeigt dütlich, dass Handligsbedarf bestoht und d Unzfredeheit gross esch. Di Unterzeichnete bitted de Regierigsrot, au wägem akute Lehrermangel, die Petition rasch umzsetze.
Begründige und meh Detail findet ihr do
