Am Samschtig, 20. April 2024 hed de Kanton Aargau zome öffentliche Besichtigungsaalass is ehemalige «St. Bernhard» iglade. Di zuekünfig Leitig, de Regierisrot Jean-Pierre Gallati und au Verantwortlichi vo de Gmeind Wettige, de Roland Kuster und de Markus Haas send für Froge zur Verfüegig gstande.
Im ehemalige «St. Bernhard» wird e kantonali Asylunterkunft eröffned (mir händ am 1.März drüber brechtet). Di erste Familie sölled ab em 1. Mai chönne ine Zügle.
Rund 200-250 Interessierti händ hüt zwüsche Zäni und Zwölfi am Vormittag d Möglichkeit gnutzt, sech be eme Rundgang usführlich z informiere. So hed me zum Bispil di einzelne Zimmer chönne bsichtige. Au d Chuchi, wo de Bedürfinss aapasst worde isch, het me chönne aaluege. A Stell vo de Gross-Chuchi heds mehreri,einzelni Chochherd mit Backofe und a Stell vome grosse Chüehler heds mehrei grossi Chüehlschränk med einzelne, abschliessbare Fächer. So hed jede Familie d Möglichkeit für sech, ihres eigene Esse selber z choche. Au be de Wöscherei geds einigi, eigeni Wöschmaschene, wo denn aber, nach de Idee vo de Leitig vom Asylzentrum, vo Mitbewohner für es chlises Entgeld sölled bedient werde. Für d Chend ged en Chendergarte, e Primarstufeklass und e Oberstufeklass.
Es sind au süsch veel Froge gstellt worde wo grossmehrheitlich beantwortet worde send. Rund um d Sicherheit vo de Familie, wo denn mol det werdet wohne, aber au um Famlie, wo rundume wohned. So wird en 24 Stunde Sicherheits-Service ufbaut, wo für alles werd bsorget sii.
Generell esch das en sehr informative und guete Aalass gsi wo guet gschuhlts Peronal zo dere Durchgangs-Asylunterkunft infomiert hed.
Nach em Bezug stood de Anwohner de au e Hotlinenummere zur Verfüegig.