S Dame- und s Herre-Team vo Rotwyss hends gschafft: Sit geschter hend beidi Teams en witere Schwiizermeischtertitel im Palmarès.
Scho d Halbfinal am Samschtig, 18. Juni 2022 sind, trotz de grosse Hitz, vielversprechend gsi. D Manner hend in ihrem Halbfinal gege de HC Olte souverän 7-1 gwonne. Au d Fraue hend dütlich gmachd, dass sie d Meischterschaft nach em Pech im letschte Johr, wo si de Final im Shootout verlore hend, i dem Johr wend gwünne. Im Halbfinal het das zueme 4-0 gege d Black Boys HC Gämf gfüehrt.
Am Sunntig isch es dann drum gange, ob di beide Teams ihri ansehnlichi Lischte vo Meischtertitel no einisch chönnd verlängere. D Herre hend gege GC ins Shootout müesse, nachdem es nach de reguläre Spielziit 1-1 gheisse het. Dete hend sie mit 4-2 gwonne. D Dame hend gege de Lozärner SC mit eme 4-0 en klare Sieg iigfahre. D Stimmig uf de Bernau isch nach dere Doppelmeischterschaft unbeschriblich gsi!