Am 26. September 2021 wird de Iiwohnerrot noi gwählt. 142 Lüt kandidiered für di 50 Sitz.
Dass es im Iiwohnerrat in de laufende Legislatur scho 25 Wächsel geh het, hend mir scho brichted. Vo de 28 Lüt, wo vor chnapp 4 Johr in de Iiwohnerrot gwählt worde und noch debi sind, werded in de noie Legislatur aber no einisch e paar fähle. Ob öppe vilicht nüm gwählt wird, wüssed mir natürli ned, aber unter de 142 Kandidierende sind 6 amtierendi Iiwohnerröt nümm debi. Maximal 22 sind in de noie Legislatur dann meh wi 4 Johr debi.
Nümm aaträte werded d Fränzi Widmer und de Thomas Egloff (beidi Forum 5430), bi dene di ganz Partei uf en ernoiti Kandidatur verzichted. Es falld aber au uf, dass de François Chapuis (CVP), aktuell de Präsident vo de Finanzkommission, nöd uf de Liste vo de Kandidierende ufgführt wird, wo d Gmeind veröffentlicht het. Au de Präsident vo de Gschäftsprüefigskommission, de Thomas Wolf (SVP) tritt nümm aa. Ebeso fählt de Stefan Meier uf de Liste vo de SVP. Bi de SP tritt d Alexandra Wernli nüm aa, wo erscht im März für d Andrea Fischer nochegrückt isch.
Anderscht gsehts bi de FDP, de glp, de EVP und bi Wettigrüen us. Dete träted alli bisherigi wider aa, bi de Grüene sind aber di Bisherige uf de Listeplätz 3 und 4 platziert, wil d Partei schints de Klimajugend de Vortritt wot lah.