D Füürwehr Wettige het hüt, Mittwoch, 27. Jänner 2021 churz vor de Halbinüni am Morge zueme Verkehrsunfall müesse usrücke. Es isch drum gange, es Fahrzüüg vor em Aberütsche z bewahre.
D Meldig uf de Website vo de Füürwehr isch churz und chnapp. D Füürwehr sig nacheme Verchersunfall alarmiert worde und hetti es Fahrzüüg müesse sichere, damit es ned en Abhang aberütscht. Au d Sperrig vom Wäg sig d Ufgab vo de Füürwehr gsi. Für d Bärgig vom Auto sig dann es Bärgigsunternehme ufbote worde.
We me d Foti aaluegd, wo d Füürwehr veröffentlicht het, dann stellt sich d Frog, wi es Fahrzüüg überhaupt an di Stell annechunnd. Nach unbestätigte Aagabe isch en Automobilistin vo de Chlosterhalbinsle her vo ihrem Navi uf de Velowäg zwüsche Kantonsstross und Kanti-Sportplatz gführt worde. Si sig dann links unter de Brugg dure und s Wägli Richtig Staumuur füregfahre, wo si dann vor de SBB-Brugg gmerkt het, dass das ned de rächt Wäg cha si.
Glich, ob es tatsächlich genau eso oder numme so ähnlich gsi isch, isch eis offesichtlich: Sich blind ufs Navi z verlah, ich nie e gueti Idee.