Am Tsischtig, 26. Januar 2021 isch es öppe um Halbisächsi am Abe zueme Unfall cho. En Fuessgänger isch dodebi licht verletzt und ins Spital brochd worde.
In ere Mediemitteilig schribd d Kantonspolizei (Kapo), dass en 55-jährige Autolenker mit sim Toyota vom Chreisel bi de Center-Passage Richtig Dorf het welle fahre. Z erscht het er bim Fuessgängerüberwäg aaghalte, um öpperem de Vortritt z gwähre. Wo di Person dann aber doch ned losgloffe isch, isch de 55-jährig losgfahre. Dodebi het er überseh, dass vo de andere Site her en 58-jährige Fuessgänger cho isch und het en touchierd. De Fuessgänger isch umgheit und het sich licht verletzt. D Ambulanz het e dann ins Spital brochd. De Unfallverursacher isch bi de Staatsaawaltschaft verzeigd worde und het sin Fahruswiis müesse abgeh.