Drü Futsal Maniacs sind zur WM-Quali z Bosnie

In de nächschte Täg spild di Schwiizer Futsal-Nati z Bosnie um d Qualifikation für d Wältmeischterschaft. Drü Spiler sind vom Wettiger Team AFM Futsal Maniacs.

Im Vergliich zu de Fussballer frischted d Futsaler au bi ois i de Schwiiz ehnder es „Schattendasein“. Derbi isch es e technisch aaspruchsvolli Variante, wo da i de Halle gschpild wird. Und es git alles, wi au bi de „Grosse“. Ab hüt am Abe spild d Schwiiz d WM-Qualifikation. D Match finded alli z Bosnie-Herzegowina statt. Hüt, Tsischtig, 29. Jänner 2019 tschutet d Schwiiz gege Bosnie, morn gege d Türkei und am Fritig, 1. Februar gege Schottland. Alli drü Match started um Föifi am spote Namittag.

Vo de Maniacs sind de Felipe Farias de Almeida, de Alessandro Facchinetti und de Claudio Coelho derbi.

Mir wünsched oiserne Wettiger Futsaler und de Nati viel Erfolg!!