De Hansjörg Huser isch noie Iiwohnerrotspräsident

Am Donnschtig, 25. Januar 2017 het sich de Iiwohnerrot s erschti Mol in de noie Legislatur troffe. Nebe em Büro vom Iiwohnerrot isch au d Finanzkommission (Fiko) und d Gschäftsprüefigskommission (GPK) gwählt worde.
D Wahl vom noie Iiwohnerrotspräsident isch unbeschtitte gsi. Di 47 aawesende Iiwohnerröt hend de Hansjörg Huser (SVP) mit 46 Stimme gwählt. Zum Vizepräsident isch de Christian Pauli (FDP) geählt worde, so dass er vernuetlich in zwei Johr Präsident wird werde.
In d Fiko sind nebe de bisherige Mitglider Philipp Bürgler (FDP), François Chapuis (CVP), Daniel Notter (SVP) und Leo Scherer (SP/WG) neu de Thomas Benz (CVP), d Silvia Berz (SVP) und d Kristin Lamprecht (SP/WG) gewählt worde. Noier Präsident isch de François Chapuis. No meh noii Gsichter gits in de GPK. Durch d Wahl vo zwöi bisherige GPK-Mitglider in de Gmeindrot, d Abwahl vom Jürg Meier und de Rücktritt vom Orun Palit (glp) sind noi de Dacfey Dzung (SP/WG), d Angela Eckert (FDP), d Manuela Ernst (glp) und d Simona Nicodet (CVP). Dazu chömmed di drü bisherige, de Andreas Benz (CVP), de Lutz Fischer-Lamprecht (EVP/Forum) und de Thomas Wolf (SVP). Noier Präsident isch de Lutz Fischer-Lamprecht.
Es Novum in de Gschicht vo Wettige isch, so het es de Alain Burger noch vor de Wahle formuliirt, dass insgsamt föif Frau in dene beide Kommissione sind.