Am Mentig started d Post im Volg

Geschter, Fritig, 17. Januar 2020 het d Post a de Seminarstross zum letschte Mol für Privatkunde offe gha. Am Mentig gits dann di erscht Postagentur z Wettige.

Dass s Postamt a de Seminarstross gschlosse wird, het z Wettige für vil Unverständnis gsorged, zumal d Post au di andere beide Poststelle wot zuedue. Di werded durch e noii Filiale ersetzt werde, bi dere de Standort no ned gfunde isch.

De Ersatz für d Post a de Seminarstross isch ab em Mentig d Postagentur im Volg. D Mitarbeiterinne sind i de letschte Wochene gschueled worde und im Lade isch d Infrastruktur für d Post ibaud worde. Au e Briefchaschte, wo aber no ned in Betrieb isch, stoht vor de Türe und au s Schild dusse isch scho montierd. Das isch de Grund, warum Lüt au scho im Volg ihri Postgschäft hend welle erledige.

E Postagentur biete ned alles aa, wi e normali Post. Us dem Grund erwarted d Gmeind au ned, dass de Vercher meh wird zueneh, wi es für e Quartiersammelstross vorgseh isch.