Geschter, 17. Juni 2026 hets am Morge bim Lägeregrat brönnd. D Ursach isch wahrschinlich es Füür gsi, wo ned richtig glöscht worden isch.
Am Mittwochmorge churz ab de 10i het e Person bi de Kantonale Notruefzentrale aaglüte und het mitteild, dass si bi ere Wanderig uf de Lägere en chline Brand bemerkt het. Sie hetti de Brand aber chönne lösche. Es dät aber no fescht rauche.
Wege dere Meldig sind dann Patrouille vo de Stadtpolizei Ännetwettige und de Regionalpolizei Wettige-Limmattal und d Stützpunktfüürwehr Ännetwettige vor Ort ufbote worde. D Besatzig vomene Rettigshelikopter, wo gliichzitig in de Nöchi gsi isch, het en Flurbrand uf em Lägeregrat gseh. D Füürwehr het dann in dem unwegsame Gländ de Brand, wo öppe e Flächi vo 20 m x 20 m betroffe het, vor de 1 am Mittag chönne lösche.
Am Abig, churz vor de 8i het öpper im gliiche Gebiet wider Rauch feschtgstellt. D Stützpunktfüürwehr und Stadtpolizei sind no einisch usgrückt und hend s Gebiet mit ere Drohen inspizierd. En noie Brandusbruch het aber ned chönne feschtgstellt werde.
D Polizei het z erscht vermuetet, das en Glassplitter wege de starche Sonneiistrahlig de Brand auflöst het. In de Zwüscheziit het si das korrigiert. Im Verlauf vom Donnschtighend Spezialischte vo de Brandursachermittlig vo de Kantonspolizei Aargau (Kapo) de Brandplatz inspiziert und e Füürstell unmittelbar uf em Grat am Rand vom Brand feschtgstellt. Nach em aktuelle Stand goht d Kapo devo us, dass am Samschtig am Abig öpper an dere Stell es Füür gmachd und es ned richtig abglöscht het. De starchi Wind vom Sunntig dörft das Füür wider entfacht ha, wo sich dann im Ärdriich usbreited het. Als Brandursach stoht dodemit Fahrlässigkeit im Fokus. D Kapo bitted Persone, wo Beobachtige gmachd hend oder Aagabe zum Fall chönnd mache, sich bim Stützpunkt Bade vo de Kapo z melde: Telefonnummer +41 (0)56 200 11 11 oder per E-Mail: stuetzpunkt.baden@kapo.ag.ch. Meldige chönnd aber au bi jedem andere Polizeiposten gmachd werde.