Vili chönnd es fascht ned erwarte, bis s Wettiger Fäscht losgoht. Es isch de alljährlich Start in d Sommerferie.
Vom 3. bis 5. Juli 2026 fiired Wettige di 51. Usgab vom Wettiger Fäscht. Wie immer, isch s Festgelände rund ums Rothuus, im Brüehlpark und ums Bezirksschuelhuus.
De Familiepunkt bieted es vilsitigs Aagebot für Familie und jungi Bsuecherinne und Bsuecher. Es Highlight isch s Chinderkonzert, wo am Sunntignamittag uf de Operair-Bühni stattfind. Au für di ältere Fäschtbsuecher hets Fäscht musikalisch einiges z biete. Am Samstigabe stohd Phenomden uf de Bühni, am Sunntig Baba Shrimps. D Realisirig vo de beide Hauptacts isch numme mögli, wil de Verein Wettiger Openair, wo di Konzert organisiert, vo de lokale Partner Obrist Transport und de Aargauische Kantonalbank unterstützt wird. Nebe de Hauptacts sind no vili andere Künstler uf de Bühni. Am Fritig sind das Nomuel, Dudette, Splendig und Dibbasey, am Samschtig Lunar Blue, Jamila, wie scho gsaid Phenomden & the Scruscialists und 2 Silent und am Sunntig Laurent & Max bim Chinderkonzert und dann nebe Baba Shrimps au Anima Dolce und Crawling Crows.
Für d Sicherheit sorged di routinierti Zammenarbet mit de Gemeind, de Regionalpolizei, de Füürwehr de Sanität, em Sicherheitsdienst und em Bauamt.
Es bsunders Härzstück vom Wettiger Fäscht sind di traditionelle Fäschtbeize wo vo Wettiger Verein betriebe werded. Mit ihrne individuelle Konzept, viel Engagement und kulinarischer Vielfalt präged si s einzigartigi Ambiente vom Fäscht, schriibds OK in siner Mediemitteilig.