Sit Monate warted mir z Wettige uf de Standortentscheid vo de ehemolige ABB Power Grids, hüt Hitachi Energy. Wettige oder doch Otelfinge? De Konzern het entschiede.
De Kanton Aargau und d Gmeind Wettige hend mit Vollgas versuechd, d Aasidlig vo Hitachi Energy uf de Tägerhardächer mögli z mache. D Aahörig vom Kanton zu de Richtplanaapassig und s Mitwirkigsverfahre für d Teilrevision Nutzigsplanig «Tägerhardächer» sind grad nachenand gmachd worde, zum kei Ziit z verliere. Gliichzitig het au Otelfinge versuechd, sich für Hitachi Energy fit z mache. Im Limmattal hets vor allem vo de Gmeindröt vo Würelos und Noiehof Widerstand geh, obwohl de Vercher und de Druck uf de Wohnigsmärt, wo zwee vo de offizielle Gründ vo de Gmeindröt gsi sind, bi ere Aasidlig z Otelfinge ned anderscht währed.
D Grossratskommission für Umwält, Vercher, Energie und Ruumordnig (UBV) het mit 13 Ja, einere Nei-Stimm bi einer Enthaltig de Aapassig vom Richtplan zuegstumme. D Iiwohnerrotsparteie vo Wettige hend in Mediemitteilige au d Unterstützig fürs Projäkt dütlich gmachd. Gnützt het alles nüd. Hitachi Energy het hüt bekannt geh, dass si de Campus z Otelfinge werded baue. Gegenüber de Mitarbeiter het Hitachi u.a. uf di gueti Erreichbarkeit mit em eigede Bahnhof higwisse, s gringere Risiko von Verzögerige und di bestehende Gebäud, wo di eigede Nachhaltigkeitsziel unterstützed.