Am Zischtig, 22. April 2025, händ sech d Wettiger Ortbürger zonere usserordentliche Versammlig im Tägi troffe. Debii esch es um d Landabgab vo de Parzelle 789 und 3271 gange.
Um was das es do im Detail god, hämmer i dem Artikel brechtet: https://wettiger-nochrichte.ch/2025/04/02/internationals-industrieunternehme-zeiged-interesse-an-wettige/
Es send ca. 260 interessiert Persone, 180 Mitglieder/Stimmberechtigi, de Gsamt-Gmeindrat und Gäst im Tägi itroffe um über d Abgab vo Land an e internationals Unternehme z diskutiere und vorallem drüber z entscheide. De Gmeindamme Roli Kuster hed das Vorhabe usfüehrlich vorgestellt und einige Details erchlärt. D Finazkommision vo de Ortsbürger und Ortsbürgerkommission hend es JA empfohle . De Urs Meyer vo de Tägi-Kies AG hed ime churze Statement sin Standpunkt darglaid. Er sig für Gspröch offe und heig es Verständnis für das Vorhabe, het er gsaid.
Es esch rege über Pro und Kontra diskutiert worde. Eis vo de gröschte Problem esch de Vertrag, wo im Grundbuch itreit esch, wo’s med de Tägi-Kies AG ged. Au e allfälligi Ufwertig vo dene Parzelle würd einiges ah Stür-Choste für d Ortsbürger bedüte, au wenn das Geld, nach einiger Ziit weder inne chond dur de Baurechtsvertrag. Das de Name ned bekannt esch, esch au es grosses Thema gsi ..
Gege Endi vom Obig händ sech d Ortsbürger, innere geheime Abstimmig, med 116 -Ja zu 50 Nei-Stimme für d Landabgab entschiede. 130 Stimme wäred nötig gsi für 1/5 Mehrheit, wo es fakultativs Referendum würd unmöglich mache. So cha jetzt aber no es Referendum ergriffe werde. Aber gliich, ob mit oder ohni Referendum: s letschte Kapitel zu dere Storie esch no ned gschrebe!