Gmeindrat macht Beschwerde wäge de Pflanzabständ

Sit em 28. Oktober 2026 isch di noi Allgemein Nutzigsplanig (ANUP) in Chraft. De Regierigsrat het aber en Paragraf zu de Pflanzabständ gstriche. De Gmeindrat isch demit ned iiverstande und glanged ans Verwaltigsgricht.

De Regierigsrat vom Kanton Aargau het Ändi Oktober d Gesamtrevision vo de ANUP vo de Gmeind guetgheisse. Damit sind di zum Teil meh wie 20 Johr alte Vorschrifte abglösd worde. Di noi Bau- und Nutzigsordnig (BNO), wo de Iiwonerrat am 4. Dezember 2025 beschlosse het, gseht bi de Pflanzabständ Lockerige vor. So sell me au Bäum bis uf 2 Meter a d Parzellegrenze dörfe setze (gmesse vo de Mitti vom Stamm uus). De Regierigsrat het das aber ned guetgheisse und d Absätz 1 und 2 vom § 57 vo de BNO gstriche.

De Gmeindrat isch de Meinig, dass de Entscheid vom Regierigsrat ned mit em geltende Rächt und au ned mit em kantonale Richtplan veribar isch und au wichtige öffentliche und private Interesse entgegenstoht. Er macht drum Beschwerde bim Verwaltungsgricht, zum de Entscheid überprüefe loh.

Für d Bevölkerig und für die, wo in Wettige baue wänd, änderet sich durch d Beschwerde nüt. Mit Usnahm vo de zwöi gstrichene Absätz isch di noi Nutzigsplanig sit em 28. Oktober 2026 in Chraft.