Dass d Franz-Garage a de Landstross, wo früehner d Garage Baschnagel gsi isch, für e Wohnüberbauig wird wiiche, isch scho lang klar gsi. D Gmeind het jetzt s Mitwirkigsverfahre für de Gsatltigsplan gstartet.
Scho im Januar 2019 hend mir erschtmols über de Gstaltigsplan fürs Baschnagel-Areal brichtet. Föif Johr spöter liegt er fürs Mitwirkigsverfahre uf, wi d Gmeind Wettige uf ihre Website mitteild. Bis zum 25. März 2024 cha me dra teilneh.
Planed sind uf em Areal, wo sit meh wie 50 Johr e Garage isch, 161 Wohnige. Di beide Baukörper selled föif- bis sibegschossig si und im Erdgschoss uf de Site zu de Landstross e «publikumsorientierti Nutzig» ha. D Tankstell und d Bushaltestell, wo im Bauperimeter liged, selled erhalte, aber baulich aapassd werde. De Bricht zum Gstaltigsplan umfasst 85 Site und cha do aaglueged werde.