Vor öppe eim Johr het de gwaltsami Tod vomene 69-jährige Maa im Lindenhofquartier Schlagziile gmachd. Jetzt isch klar, dass de beschuldigt 64-jährig in Notwehr ghandeld het.
Wie d Kantonspolizei mitteilt, het d Staatsanwaltschaft s Verfahre gege en Maa, wo vor eme guete Johr im Lindehofquartier wegem Verdacht uf vorsätzlichi Tötig verhafted worde isch, iigstellt. Er het chönne glaubhaft darlege, dass er in Notwehr ghandled het. Demnach het de spöter verstorbeni 69-jährig Chines bi dem ihm vo früehner bekannte 64-jährige Vietnames um e vorübergehendi Unterkunft aagfröged. Wil sich di beide vorher föif Johr nüm gshe gha hend, het de 64-jährig nüd vo de paranoid-halluzinatorische Schizophrenie vom Chines gwüsst und au ned, dass letzterer zur Verhaftig usgschribe gsi isch. Wo de Vietnames am Morge grad am Zähputze gsi isch, isch de 69-jährig mit eme Messer uf ihn los. De 64-jährig het mit de blose Händ de Messeraagriff abgwehrt, indem er in d Klinge glangt het. Mit Verwundige am Körper und a de Händ het er das Messer zum Aagrifer chönne wende, wobi der im Beriich vom Buuch troffe worde isch. In de Folg isch de Chinese no vor Ort verstorbe.
D Staatsaawaltschaft het bi de Untersuechige zum Fall festgstellt, dass de beschuldigti Maa in aagmessener Wiis uf d Bedrohig reagiert het und kei Gwalt aagended het, wo über d Notwehrsituation usse gange isch. Er het au nach de Abwehr vom Aagriff sofort de Polizei aaglüte, isch kooperativ gsi und het ned versuechd, Spure z verwüsche oder vom Tatort z flüchte. De Vietnames isch us dem Grund gänzlich entlastet, wi d Staatsaawaltschaft mitteilt.