Am Tsischtig, 13. Dezember 2022, churz vor de 1 am Mittag, isch es uf de A1 zwüsche Wettige-Ost und Schpreitebach zueme Unfall cho. De Grund sind gegesitigi Provokatione und es riskants Bremsmanöver gsi.
Wie d Kantonspolizei innere Mediemitteilig schriibd, sind geschter, churz vor de Eis en VW Polo und en Audi A6 uf de Autobahn Richtig Züri unterwägs gsi. Warum si sich gegesitig provoziert hend, isch no ned klar, aber aagfange mit Liechthupe het sich d Usenandersetzig bis zu riskante Ünberholmanöver gsteigered. Schlussendlich het de VW de Audi überholt, mit gringem Abstand uf d Spur vom Audi gwächsled und starch bremsed. Dadurch isch es zuere Kollission zwüsche de beide Fahrzüüg cho und au en BMW, wo hinter em Audi gfahre isch, het nüm rechtzitig chönne bremse und isch ins Heck vom Audi gfahre.
Bim Unfall sind drü Insasse licht verletzt und mit Ambulanze ins Spital brachd worde. De Sachschade an de drü Fahrzüüg liegd bi öppe 70’000 Franke. D Polizei het de Lenker vom VW und em Audi de Führeruswiis abgnoh und di beide und di Lenkeri vom BMW sind bi de Staatsaawaltschaft verzeigd worde.