Geschter het uf Whatsapp und andere Medie en Ufruef d Rundi gmachd, d Chileglocke in ganz Europa würde am Abe um Achti lüte. Das isch ned de Fall gsi, während aber hüt um zwölfi di ein oder dörft lüte.
D Nochricht, wo in de Soziale Medie geschter d Rundi gmacht het, het vili Lüt bewegt. Wenn alli Glocke in ganz Europa am Abe um Achti würded lüte, wär das es starchs Zeiche. Wer die Nochricht verfasst het und warum, isch ned usezfinde gsi. Vili Lüt, wo ufs Lüte gwarte hend, sind enttüscht gsi.
Aktuell gits en Ufruef vo de Europäische Vereinigung vo de Dombau-, Münsterbau- und Bauhüttemeister, hüt um Zwölfi für 7 Minute (für di bisher 7 Chriegstäg) z lüte. «Di reformiert Chile het hüt am Morge öppe um 9i devo erfahre», said de Pfarrer Lutz Fischer-Lamprecht. Sither het er versuecht, de katholisch Pfarreileiter z verwütsche, dass me chönnd mitenand es Zeiche für de Friede setze. «Das isch mir bis jetzt ned glunge, so dass mir wahrschinlich allei werde lüte», said de refomiert Pfarrer. So churzfristigi Aktione siged aber immer schwirig umzsetze und er isch froh, dass me mit em Friedensgebet vom letschte Sunntig, wo au a de nächste Sunntige (6. und 13. März um Föifi in de Kapelle St. Anton) stattfinde werde, es gmeinsams Zeiche het chönne setze.