Jewils an Aafang vo de neue Legislatur wird de Iiwohnerrat neu konstituiert. S Büro wird do debi für 2 Johr gwählt, d Kommissione und s Wahlbüro für 4 Jahr, also die ganz Legislatur.
Wie immer am Aafang vonere Legislatur esch d Sitzig vom Iiwohnerrat vom Gmeindamme eröffnet worde. Er hed au d Sitzig bis zu de Wahl vom Ratsbüro gleitet. Wie erwartet esch de Lutz Fischer-Lamprecht (EVP) gwählt worde. Aschlüssend esch de Christian Oberholzer (SP) zum Vizepräsident gwählt worde und Stimmezähler sind 2022/23 d Gabriela Keller (FDP) und de Fabian Käufeler (D Mitti CVP).
Au d Wahl vo de Finanzkommission (Fiko) und de Gschäftsprüefigskommission (GPK) samt der Kommissionspräsidie sind unspektakulär über d Bühni gange. Fikopräsident esch de Thomas Benz worde. Mit ihm d Finanze vo de Gmeind genau durchlüchte werded sin Parteikolleg Marcel Aebi (beidi ghöred zu de Mitte-Fraktion), de Adrian Knaupp und für numme 2 Jahr de Leo Scherer (beidi SP/WG), de Jürg Baumann (SVP), de Orun Palit (GLP) und de Daniel Brüllmann (FDP). Dodemit esch d Fiko es reins Männergremium.
Bi de GPK esch de Andreas Leuppi (Wettigrüen) Präsident worde. Zudem in d GPK gwählt worde sind d Christa Camponovo (SP), d Simona Nicodet (D Mitti CVP) und de Lukas Rechsteiner (EVP), beidi vorgschlage vo de Mitte-Fraktion, d Michaela Huser (SVP), d Ruth Jo. Scheier (GLP) und d Gabriela Keller (FDP).
Bi de Sitzordnig hets en Wechsel geh. Wil d FDP-Fraktion chliner und d GLP-Fraktion dütlich gwachse isch, hend beidi Partei d Site mitenand gwächseld.