Wer chund in de Gmeindrat? Welli Partei gwünned Sitz im Iiwohnerrot und welli verliered? Es bruuch no e chli Geduld.
Niemed, wo mir gfröged hend, traut sich e Prognose für s Wahlergäbnis am Sunntig, 26. September 2021 z mache. Und d Aaspannig isch gross, au das isch z gschpüre. Au wills bi Gmeindwahle kei Umfrage git, wo en Hiwiis ufs Ergäbnis chönnted geh, bliebed d Wählerinne und Wähler und au d Politbeobachter uf Vernuetige aagwise.
Werded alli sibe bisherige Gmeindrät im Amt bestätiged? Wenn nei, gits dann au en noie Gmeindamme oder en noie Vizeamme?
Au bi de Wahle vom Iiwohnerrat wirds Sitzverschiebige geh. Allei scho wegem Verzicht vom Forum 5430 uf e Kandidatur wird zu zwöi Sitzverschiebige führe. D Frog isch au, wi es mit de «grüene Welle» usgseht, wo bi de National- und Grossratswahle zu Gwünn bi de Grüene und de glp gführt het. Politinteressierti werded hinterher sicher au analysiere, wi fescht sich volli Wahllischte und d Plakatfluet usgwirkt het.
Aber noch heissts abwarte und d Lüt zum Wähle z annimiere. Sind ihr scho gsi? Wenn ned, dann müend ihr d Couvert im Rothuus in de Briefchschte rühre. Für d B-Post isch es z spot.