Es esch cho, wi es im Vorfeld erwartet worde esch. De Iiwohnerrat het de Erwiterigsbau vo de BEZ dütlich abgelehnt.
Scho d Ablehnig dur d Finanzkommission (Fiko) mit 7 vo 7 Stimme het zeiged, in welli Richtig es würdi goh mit em Erwiterigsbau vo de BEZ: De Iiwohnerrat het d Vorlag vom Gmeindrat für en Erwiterigsbau in modularer Hybridbauwiis abglehnt. In de Vote und bi de Stimme vo de SVP un De Mitti isch d Ablehnig einhellig gsi und bi de SP und de FDP hets einzelni geh, wo für d Erwiterig gstimmt hend. D Manuela Ernst het für d glp es em Gmeindrat gegenüber vernichtens Votum ghalte, aber glichwohl het sich d Hälfti vo de Fraktion de Stimm enthalte und einstimmig für d Vorlag isch numme d Fraktion EVP/Forum 5430 gsi. De Lukas Rechsteiner het vorher gsaid warum: Es würd uf Koste vo de Schueler goh, we me de Erwiterigsbau würd ablehne, finaznielli Risiko sig z höch und letztendlich sig em Gmeindrat ufgrund vo de bisherige Abstimmige im Iiwohnerrat und bi de Volksabstimmige gar nüd anders übrig blibe, wi es schlanks und günstigs Projekt vorzschlah.
EInigermassen ernüchtert isch au de für de Hochbau zueständig Gmeindrat Martin Egloff gsi. Er het betont, dass es schwirig sig, di unterschidliche Gründ für d Ablehnig unter ein Huet z bringe. Di eine hend abglehnt, wil si für weniger Geld di gliich Flächi hend welle ha, anderi, wil si fürs gliiche Geld me Flächi hend welle ha, anderne sig s ganzi Projekt z tüür gsi und wider andere hend meh Reservefläche und dodemit es grössers Schuelhuus welle. Au architektonisch siged d Erwartige ned erfüllt worde. De Gmeindrat wird über d Büecher gah, het de Martin Egloff versproche, billiger würd s nächschti Projekt aber sicher ned werde. Nach de Fraktionsvote und de tellignahm vom Gmeindrat esch d Diskussion scho erschöpft gsi und de Rat het d Vorlag dütlich mit 11 Ja, 30 Nei und 5 Enthaltige abglehnt.
Einstimmig isch dodefür s noi Zugchraftfahrzüüg für d Füürwehr gnehmiged und s noi Energieleitbild zur Kenntis gnoh worde. Au d Vorstöss sind entsprechend de Aaträg vom Gmeindrot überwise bzw. abglehnt worde.