De Iiwohnerrat chonnd hüt in de Zweifachturnhalle vom Margi zu de letschte Sitzig vor de Wahle zämme. Bsunders bim Erwiterigsbau vo de BEZ dörfded d Emotione in d Höchi gah.
D Aaträg vo de Finanzkommission (Fiko) und de Gschäftsprüefigskommission (GPK), wi au d Fraktionsbricht im Vorfäld vo de Iiwohnerratssotzige, sind immer en guete Gradmesser für d Brisanz vo de einzelne Gschäft. So esch scho jetzt klar, dass s Kreditbegehre vo 12’585’000 Franke für d Erwiterig vo de Bez, wo nach de Vorstellig vom Gmeindrat in modularer Hybridbauwis sell usgführt werde, en schwere Stand wird ha. D Fiko lehnd d Vorlag mit ere seltene Einmüetigkeit vo 7 gege 0 Stimme ab, obwohl de Vorschlag vom Gmeindrat d Choschte für di gsamti BEZ, bi dere au e Sanierig vo de bestehende Baute aastoht, um 5 Millione Franke würd senke. Nach de Fraktionsbricht isch numme vomene Teil de de FDP und de Fraktion EVP/Forum 5430 e Zuestimmig z erwarte. Bi de glp isch ned eidütig, wi si sich positioniert und d SVP nutzt d Vorlag im Fraktionsbricht für de Wahlkampf. D SP schint d Hoffnig z ha, dass di bürgerliche bi ere Ablehnig in Zuekunft grosszügiger sind mit em Schulruum, wo ja vo de Gmeind immer chnapp kalkuliert worde isch, wil di bürgerlichi Mehrheit im Rat das so het welle. Uffällig esch, dass «Die Mitte CVP» einstimmig d Ablehnig aakünd, au wenn si em eigede Gmeindrat Sandro Sozzi, wo für d Schuel zueständig esch, wohl di ei oder anderi schlaflosi Nacht dörft beschere.