Was isch uf de Baustell vo de Gärtnerei Widmer los?

Bi de Baustell an de Seminarstrass laufds schints ned eso wi es sett. Zur Zit wird s noi betoniert Fundament wider ufgspitzt.

Vom Fritig, 5. März am Namittag bis Tsischtig, 9. März 2021 isch uf de Baustell nüm gschaffed worde, säged Aawohner, wo vo de andere Site vo de Seminarstrass en guete Blick uf d Baustell hend. Geschter siged Armirigsiise entfernt und abtransportiert worde und hüt hend Arbeiter aagfange, s Betonfundament ufzspitze.

Mir hend d Gmeind Wettige und d Bauherrschaft aagfröged, ob en Baustopp verhängt worde isch und was allefalls d Gründ defür chönnted si. D Gmeind het sich ned welle üssere, wil es sich um es «laufends Verfahre» handled und d Bauherrschaft het ois a de Architekt verwise.

S Architekturbüro (d KMP) het ois mitteild, dass d Arbeite am Block Richtig Stadion am Fritig freiwillig iigstelld worde siged. Nächschti Woche sell es Änderigsgsuech für das Gebäud publiziert werde. Bim Block, wo a de Seminarstrass Richtig Bahnhof erstellt werde sell, werded i dere Woche Korrekture vorgnoh und im Aaschluss dra sell witerbaud werde. Welli Korrekture konkret müend vorgnoh werde, het de René Müller vo de KMP ned mitteild.