Wie sell Wettige im 2035 usgseh?

Wettige sell in de nächschte Johr und Johrzehnt en schöne Ort zum Wohne, en attraktive Ort zum Schaffe si. Au es moderns Schuelaagebot, vilfältigi Möglichkeite zum goh Poschte und es attraktivi Erholigsgebiet selled Wettige uszeichne. Im Rüümliche Entwickligsleitbild (REL) het d Gmeind d Ziel für 2035 feschtghalte.

Au we Wettige wachsd und meh Lüt du wohne und schaffe, sell Wettige attraktiv bliibe. Hüt het Wettige öppe 21’000 Iiwohner und isch dodemit nach Aarau di zwöitgröscht Gmeind im Kanton. D Prognose vom Kanton gönd devo us, dass Wettige bis 2035, also in 15 Johr, zuesätlich 5’000 Iiwohner het.
Eini vo de wichtigschte rächtliche Grundlage zum Stüüre vo dere Entwicklig, isch d Baum- und Nutzigsordnig (BNO) und de zueghörig Bauzoneplan. Er regeld, wo z Wettige gwohnt und wo gschaffed wird und uf welli Art und Wiis me dörf baue. Öppe alli 15 Johr stted BNO und Bauzoneplan überprüefd und überarbeited werde. Z Wettige hend di letschte grundsätzliche Aapassig im 2001 stattgfunde. Us dem Grund isch d Gemind sit em 2018 und au i de näschschte Johr no dra, das Planigsinstrument z prüefe und wo nötig noi z justiere.
Mit de Erarbeitig vom REL erfolged en erschte wichtige Schritt, wil dete de hütig Zuestand analysiert und genaui Ziel für di witeri Entwicklig vom Sidligsgebiet, de Freiräum und de Landschaft formuliert werded. De Iiwohnerrot het scho zwöimol d Aspekt vom REL diskutiert. Zum de Blick ufs Leitbild no einisch z erwitere, lad d Gmeind alli interessierte Wettigerinne und Wettiger zueme Workshop ii. Er find am Samschtog, 27. März 2021 vom 9i bis em 1 statt, wege de Pandemie als digitale Workshop. S Ziil isch, dass d Teilnehmende s REL verstönd und Inputs für di wieri Arbet chönnd mitgeh. D Ergäbnis vom Workshop flüssed in di witeri Planig ii.

Alli witere Informatione und d Möglichkeit, sich aazmelde, find me do