A de Wiehnacht sind d Gottesdienscht traditionell dütlich besser bsuecht wi schuscht. Wi gönd d Chilene damit um, dass numme 50 Lüt pro Gottesdienscht erlaubt sind?
Zunächscht sind Chilene erlichtered, dass si nach der Verschärfig vo de Massnahme durch Bund und Kanton vom 18. Dezember 2020 ned no emol alles müend umplane. Aber was hend si denn planed?
Bi de Reformierte wirds am Heilige Abe um 6i en zuesätzliche Familiegottesdienscht geh, so informiert d Chilegmeind in ihrem Infoblättli. «In normale Johr chömmed zum Familiegottesdienscht öppe 120 Lüt», so de reformiert Pfarrer Lutz Fischer-Lamprecht gegenüber de Wettiger Nochrichte. «Mir gschpüred aber durch Corona en dütliche Rückgang bim Gottesdienschtbsuech, wil vili Lüt lieber vorsichtig sind und ned unter Lüt gönd und das isch ja au guet eso. Aber für di, wo gärn wette cho, wend mir en schöne und sichere Chilebsuech mögli mache. Us dem Grund bieted mir en zuesätzliche Familiegottesdienscht um 6i am Abe aa. So hend mir 100 Plätz für d Familiegottesdienscht und no einisch je 50 i de Christnacht und a de Wiehnacht.» Um kei Lüt an de Chiletüüre wider müesse heischicke, müend sich alli bis am Tsischtig, 22. Dezember aamelde (do alli notwendige Infos).
Au di römisch-katholische Pfarreie St. Anton und St. Sebastian hend d Aazahl Gottesdienscht erhöht. Eine finded im Freie statt und zwöi werded gstreamt. Au bi ihne isch en Aameldig notwendig (alli Infos do) und ebefalls bis am Tsischtig mögli. Oisi Aafrog bim Gmeindleiter zu de Weihnachtsgottesdienscht isch no ned beantworted worde. Mir werded de Artikel ergänze, sobald mir meh wüssed.
Bi allne andere Gmeinde z Wettige, und das sind mit de Christkatholike, de FEG, de Baptiste, de Pfingstgmeind, de Neuapostolische und andere ned wenig, verwiised mir uf di jewiligi Huussite.