Ged’s weder e langi Iiwohnerrotssitzig?

Am letschte Donnschtig, 12. November 2020 hed de Iiwohnerrot bis Viertlabeis i de Nacht taged. Stoht hüt scho weder so e langi Sitzig aa?
D Traktandelischte für die hütig Iiwohnerrotssitzig esch churz, aber hets in sich. Es sind nämli numme zwöi Traktande, wo hüt zur Diskussion stönd: D Gmeindordnig und s Iiwohnerrotsreglement.
Ufgrund vo de Traktande- und de Fraktionsbricht cha me feschtstelle, dass weder en intensivi Sitzig uf d Iiwohnerröt warted:
– Selled Stimmbürger no über Budgte und Stüürfuess an Urne entscheide oder langeds, wenn die gwählte Volksverträter das mached?
– Müend Kreditbegehre ab 4 Millione Franke immer vors Volk oder numme, we d Unterschrifte für es Referendum zämmechömmed?
– Sell d Finanzkommission und d Gschäftsprüefigskommission zämeglägt und vergrössered werde oder esch die jetzig Situation besser?
– Wie veel Iiwohnerröt bruuchds, um e Fraktion z bilde?
Das sind einigi Themene, wo am Abe für Gschpröchsstoff dörfted sorge. De Iiwohnerrot taged weder im Tägisaal und es het au Platz für interessierti Zueschauer.