Mit Spannig esch die gestrige Iiwohnerrotsitzig erwarted worde. Vo de beide traktandierte Gschäft esch aber numme d Gmeindordnig behandled worde.
De Iiwohnerrotspräsident Christian Pauli (FDP) het scho grad am Aafang dütlich gmachd, dass er kei witeri Mammutsitzig wot, wie d Woche vorher, wo de Rot bis nach de Eis am Morge berote het. So esch es dann öppe 11i gsi, wo er nach 4 Stund und de Schlussabstimmig über die noi Gmeindordnig d Sitzig beendet het. D Gschäftsordnig wird us dem Grund binere wittere Iiwohnerrotssitzig churz vor de Wiehnacht diskutiert.
Jetzt aber zu de wichtigste Ergäbnis vo de Sitzig vom. 19. November 2020:
- D Gmeindordnig, wo no e zwöiti Lösig vor sich het und au vom Volk no muess gnehmiged werde, tritt erscht uf de 1. Januar 2022 in Chraft.
- D Fusion vo de Finanz- und d Gschäftsprüefigskommission chunnd ned zstand. Nach dem de Rot mit 23:23 entschide gha het, esch de Iiwohnerrotspräsident bim Stichentscheid uf de Linie vo sinere Fraktion bliibe.
- S Budget und de Stüürfuess müend witerhin vors Volk.
- D Kreditlimite für Landerwerbe isch uf 6 Mio. Franke erhöht worde.
- De Stelleplan muess em Iiwohnerrot zur Kenntnis brochd werde. Binere Erhöhig vo de Gsamtstellezahl muess de Iiwohnerrot zuestimme.
- S Wahlbüro het witerhin mindestens 14 Mitglieder.
- D Aazahl vo de Paragraphe esch vo 45 uf 14 gsunke, wil di Regelige, wo im kantonale Gmeindgsetz verankered sind, nümm no einisch ufgführt werde müend.