D Gmeind Wettige bezeichned sich als «Gartestadt», «Generationestadt» und «Sportstadt». Aber werded die «Lüchttürm» au würkli gläbd? Bi de Gartestadt hend einigei Lüt Zwiifel, und us dem Grund e Petition lancierd.
Scho im 2015 hed de Gmeindrat mit de «Gartestadt», de «Generationestadt» und de «Sportstadt» drei «Lüchttürm» definierd, wo de aktuell Gmeindrat au im Legislaturprogramm 2019/2021 ufgnogh hed. E Petition zeiged jetzt, dass d Zfredeheit mit de Umsetzig – jedefalls in Bezug uf die «Gartestadt» – ned so höch esch. De Christian Vogelbacher und d Ursula Moor händ uf petitio.ch e Petition gstarted, wo sie klari Forderige stelled, um de Gartestadt meh Beachtig z schänke.
Im Siedligsgebiet, so schriibed sie, seg sit Jahre en Uniformierig vom Baute z beobachte, wo für attraktivi Freirühm und abwächsligsriiche Gärte kein Platz sig. Neu- und Ersatzbaute hend meischt e massivi Chlotzform, wo d Grundstück maximal wot usnütze. Sie vermissed debi d Sensibilität für en Iibettig i die aagränzendi Bebauig und de Naturruhm. Es sig inkonsequent, mit Strukture z werbe, wo ohni Gegemassnahme witter zerstörd würded.
D Petitionär schlaged us dem Grund folgendes vor, wobii mer de Texscht kürzd händ und bie Interesse uf de Petitionstexscht verwiised:
D Bau- und Nutzigsordnig (BNO) und d Leitsätz und -Ziel vo Wettige sölled under Mitwürkig vo de Bevölkerig gründlich ufenand abgetimmt werde.
Ab de Grössi vomene Mehrfamiliehuus sell zwingend e unabhängigi Fachplanigsperson und – falls vorhande – e Delegation vom jewiligie Quartierverein iibezoge werde.
D Gmeind söll in Zuekunft e Bewilligung vo Grossüberbauige vor de Bevölkerig Stellig neh, wi sie s Projäkt mit de Leitsätz und -Ziel vo Wettige laht lah veriibare.
D Ortsbildkommission söll neu vom Volk g’wählt werde, um d Meinigsvielfalt vo de Iiwohner zum Thema besser abzbilde.
Mit dene Massnahme wend d Petitionär verhindere, dass Wettige entdgültig zunere langwilige, monotone Agglogmeind verchond…..